Welkom by die NG Moedergemeente op Mosselbaai.
Ons gemeente is in die middel van die dinamiese en diverse kusdorp, Mosselbaai, geleë. Ons is oortuig van die volgende: God stuur ons om, met ‘n Christusgesindheid, familie en vriend vir almal te wees.
Ons skep daarom ruimte vir verskillende spiritualiteite, generasies en style – veral in ons drie eredienste waar almal welkom is en God die kern van ons aanbidding is.
Rethie van Niekerk, predikant van Somerstrand gemeente in Port Elizabeth, kom vanjaar ons Pinkster lei. Ons onthou nog die oggenddienste wat sy so drie jaar gelede oor Familiebediening gelei het. Die mense kon nie uitgepraat raak oor daardie diens nie. Rethie het saam met Siegfried Louw studeer en werk steeds saam met hom aan bydraes vir preke oor die Leesrooster in die kerk se Seisoen van Luister projek. Sy is sedert 2000 predikant in Somerstrand gemeente.
Hierdie uitreik vind tydens die skoolvakansie by Riemvasmaak in die Noord-Kaap plaas. Ons werk saam met Jimmy Meyer, die sendeling daar en gaan hoofsaaklik fokus op twee projekte onder die Boesmans en die Koi. Die eerste is om 'n kinderweek vir die plaaslike kinders aan te bied met allerhande aktiwiteite om hulle meer van Jesus te leer. Die ander deel gaan oor handewerk. Ons wil graag vir Jimmy 'n afdak opsit wat hom sal help met sy werk daar.
Dit is al weer tyd vir ons jaarlikse basaar op Saterdag, 2 Junie. Daar gaan, soos in die verlede, 'n vleistafel wees, met baie goeie gehalte vleis teen winskooppryse. Al die ander lekker dinge is soos gewoonlik daar: kerrie en rys, roosterkoeke, sosaties, poedings en nog baie meer. Vermaak vir die kinders is hoog op die agenda terwyl die ouers lekker by die koffiewinkel gaan ontspan.
Op Vrydagaand, 1 Junie wil ons graag 'n wynveiling hou as deel van die Dankfeesbasaar. Die idee is om gashere en gasvroue vir 'n tafel te kry. Die gasheer/-vrou nooi dan mense om kaartjies te koop en aan hul tafel te kom sit en 'n heerlike kaas- en wyn-ete te geniet. 'n Wynkenner gaan aan ons 'n proe-demonstrasie gee.
